Þeir sem hafa verið sviptir eignum með fjárnámi eða nauðungarsölu vegna vanskila á gengistryggðu láni, eða verið úrskurðaðir gjaldþrota vegna slíkra lána, geta átt rétt á endurupptöku slíkra mála fyrir dómstólum.

Leiðbeiningar fyrir þá sem geta nýtt sér þessa heimild munu birtast hér á heimasíðu samtakanna á næstu dögum, með nánari upplýsingum um skilyrði og nauðsynleg gögn vegna beiðni endurupptöku.
Vakin er sérstök athygli á því að frestur til að skila inn beiðni um endurupptöku rennur út 29. september n.k.
Heimild fyrir endurupptöku eignasviptingar á grundvelli ólögmætra gengistryggðra lána er í XIII. bráðabirgðaákvæði við lög nr. 38/2001 um vexti og verðtryggingu.
Ákvæðið gildir í níu mánuði frá gildistöku bráðabirgðaákvæðisins eða til 29. september næstkomandi og gildir fyrir öll lán sem voru ólöglega gengistryggð. Gildir þá einu hvort um fasteignakaup var að ræða, bílakaup eða hvað annað.
Hagsmunasamtök heimilanna eru í samstarfi við ERGO lögmenn að vinna að almennum leiðbeiningum og úrræðum fyrir þá sem geta nýtt sér þessa heimild og verða þær birtar hér á heimasíðu samtakanna á næstu dögum. Þar mun m.a. koma fram hvaða gögn þurfa að liggja fyrir svo lögmaður geti fyrir hönd lántaka farið fram á endurupptöku.
Ákvæðið er svohljóðandi:
Ef gengið hefur dómur um kröfu samkvæmt lánssamningi með óheimilli gengistryggingu skal endurupptaka heimil skv. XXIII. kafla laga um meðferð einkamála, nr. 91/1991, án tillits til þess hvort tímafrestir séu liðnir samkvæmt ákvæðum 137. gr. sömu laga. Sama skal gilda um úrskurði um gjaldþrotaskipti. Skuldara er jafnframt heimilt að óska eftir endurupptöku fullnustugerða hafi slíkar gerðir farið fram á grundvelli lánssamninga sem höfðu að geyma ólögmæt ákvæði um gengistryggingu. Heimildir til endurupptöku samkvæmt þessu ákvæði falla niður að liðnum níu mánuðum frá gildistöku laga þessara.