Fréttir af samtökunum

Ársskýrsla 2024-2025

17 February 2025 ~

Samkvæmt venju eru fundargögn birt á heimasíðu samtakanna í aðdraganda aðalfundar í formi ársskýrslu. Félagsmenn eru minntir á aðalfundinn kl. 20:00 fimmtudaginn 20. febrúar 2025, í Mannréttindahúsinu við Sigtún 42, 105 Reykjavík. Þegar framboðsfrestur rann út höfðu borist eftirfarandi tilkynningar um framboð til stjórnar.

Lesa áfram...

Aðalfundur 2025

06 February 2025 ~

Hagsmunasamtök heimilanna boða hér með til aðalfundar, fimmtudagskvöldið 20. febrúar 2025 kl. 20:00, í Mannréttindahúsinu við Sigtún 42, í Reykjavík. Skrifstofa samtakanna er nú í húsi ÖBÍ, ásamt ýmsum félagasamtökum sem starfa að réttindamálum almennings. Aðalfundur verður haldinn í miðrými hússins og gengið er inn um aðaldyr við vesturenda byggingarinnar.

Dagskrá:

Skipun fundarstjóra, ritara, og fundarsetning
Skýrsla stjórnar: Guðmundur Ásgeirsson, formaður
Reikningar samtakanna: Guðrún Harðardóttir, gjaldkeri
Tillaga stjórnar um ákvörðun félagsgjalda
Tillögur um breytingar á samþykktum
Kosning stjórnarmanna
Kosning varamanna
Kosning skoðunarmanna
Önnur mál

Framboðsfrestur til stjórnarkjörs er 7 dögum fyrir aðalfund eða til 13. febrúar kl. 20:00. Framboð má tilkynna með tölvupósti á netfang samtakanna: This email address is being protected from spambots. You need JavaScript enabled to view it..

ATHUGIÐ! Ef staðfesting á móttöku framboðs berst ekki í svari frá samtökunum, vinsamlegast tryggið þá móttöku þess með símtali til Hagsmunasamtaka heimilanna, í númerið 546-1501 á milli 10 og 14 alla virka daga.

Einnig er óskað eftir tilnefningum skoðunarmanna og sjálfboðaliðum í talningu atkvæða á fundinum. Fundargögn verða birt á heimasíðu samtakanna www.heimilin.is í aðdraganda aðalfundarins.

Hvatning til þátttöku - framboð félagsmanna!

Hefur þú áhuga á að taka þátt í starfi Hagsmunasamtaka heimilanna? Um átta þúsund félagsmenn eru í Hagsmunasamtökum heimilanna. Félagsmenn geta boðið fram starfskrafta sína með því að senda tilkynningu um framboð í tölvupósti á skrifstofu samtakanna. Samtökin hafa lengi starfað lýðræðislega að hagsmunamálum lántakenda og heimilanna í landinu, með áherslu á húsnæðismál og kröfur um sanngjörn lánsskilyrði í þágu almennings og réttlátara þjóðfélags.

Samtökin reka óháða ráðgjafaþjónustu og hagsmunagæslu fyrir félagsmenn, fylgjast grannt með störfum stjórnvalda og þróun löggjafar, senda frá sér umsagnir um hin ýmsu mál, tilkynningar til fjölmiðla þegar við á og margt fleira. Fráfarandi stjórn hvetur þá félagsmenn Hagsmunasamtaka heimilanna sem hafa áhuga á, eða búa yfir þekkingu á baráttumálum samtakanna, til þess að gefa kost á sér í stjórnarstarf.

Hagsmunasamtök heimilanna eru skráð hjá fyrirtækjaskrá sem almannaheillafélag samkvæmt lögum um félög til almannaheilla og á almannaheillaskrá Skattsins.

Með góðri kveðju,

Stjórn Hagsmunasamtaka heimilanna

Lesa áfram...

Breyting á stjórn Hagsmunasamtaka heimilanna

10 January 2025 ~

Ásthildur Lóa Þórsdóttir, formaður Hagsmunasamtaka heimilanna, hefur sagt sig úr stjórn samtakanna og þar með frá formennsku. Ásthildur Lóa sagði sig úr stjórninni 22. desember 2024 þegar hún tók við embætti Mennta- og barnamálaráðherra í nýrri ríkisstjórn Íslands. Stjórn Hagsmunasamtaka heimilanna þakkar Ásthildi Lóu fyrir vel unnin störf í þágu samtakanna á liðnum árum og óskar henni hjartanlega til hamingju með hina nýju stöðu.

Guðmundur Ásgeirsson, varaformaður, gegnir hlutverki formanns Hagsmunasamtaka heimilanna fram að næsta aðalfundi sem er fyrirhugaður 20. febrúar næstkomandi.

Lesa áfram...

Kjósum með heimilunum!

25 November 2024 ~

Stjórn Hagsmunasamtaka heimilanna ályktar að fráfarandi ríkisstjórn hafi brugðist því hlutverki sínu að standa vörð um heimilin og verja þau fyrir íþyngjandi áhrifum verðbólgu og vaxtahækkana á greiðslubyrði húsnæðisskuldbindinga almennings. Skortur á framsýni í húsnæðismálum hefur leitt til framboðsskorts og stjórn efnahagsmála brugðist með þeim afleiðingum að sífellt molnar undan þeim sjálfsögðu mannréttindum allra að eiga kost á viðunandi húsnæði á viðráðanlegum kjörum.

Ítrekaðar áskoranir

Hagsmunasamtök heimilanna voru meðal þeirra fyrstu til að sjá blikur á lofti fyrir fjórum árum og hafa síðan þá beint ítrekuðum áskorunum til stjórnvalda um að ráðast í aðgerðir til þess að verja heimilin. Því miður hefur lítið verið tekið mark á þessum aðvörunum og afleiðingarnar blasa við. Nú þegar kosningar eru á næsta leyti hvetjum við því kjósendur til að ráðstafa atkvæðum sínum eins og þeim þykir þau nýtast best í þágu heimilanna. Við hvetjum landsmenn þó til að horfa til verka og gjörða og hvaða stjórnmálaflokkar hafa sýnt það með fyrri verkum að þeir starfa skilyrðislaust að hagsmunamálum heimilanna.

Nokkrar áskoranir og tilkynningar Hagsmunasamtaka heimilanna frá 2020-2024:

26.03.2020: Tryggjum heimilunum skjól undir öruggu þaki

15.09.2020: ÍTREKUN-Tryggjum heimilunum skjól undir öruggu þaki

19.05.2020: Eiga bankar að hagnast á Covid-19?

02.09.2021: Bankarnir skulda heimilunum lægri vexti

15.12.2021: Aðvörun til neytenda vegna vaxtabreytinga Íslandsbanka

09.05.2022: Tryggjum að enginn missi heimili sitt vegna verðbólgu og vaxtahækkana!

10.08.2022: Aðgerðir gegn verðbólgunni verri en verðbólgan sjálf

20.09.2022: Fátækragildra verðtryggðra lána

01.05.2023: Heimilin eiga að vera friðhelg

05.06.2024 Vaxtastuðningur dropi í hafið

28.06.2024 Við krefjumst tafarlausrar vaxtalækkunar

22.08.2024 Í stríði gegn heimilunum

Kjósum með heimilunum!

Stjórn Hagsmunasamtaka heimilanna

Lesa áfram...

Við mótmælum...

13 September 2024 ~

Á björtu og köldu haustsíðdegi við þingsetningu Alþingis 10. september síðastliðinn stóðu stéttarfélög og heildarsamtök launafólks sameinuð að mótmælum við Austurvöll. Alþýðusamband Íslands, BSRB og Kennarasamband Íslands mótmæltu aðgerðaleysi stjórnvalda í efnahagsmálum. Ragnar Þór Ingólfsson, formaður VR var fundarstjóri og ræðumenn voru Magnús Þór Jónsson, formaður KÍ, Sonja Þorbergsdóttir, formaður BSRB, Halla Gunnarsdóttir, varaformaður VR og Þórarinn Eyfjörð, formaður Sameykis. Um fimmhundruð mótmælendur voru mættir til að hlýða á formenn stéttarfélaganna. Formaður VR og fundarstjóri talaði um tímamótamótmæli heildarsamtaka launafólks og gagnrýni á stöðu efnahagsmála, áhrif þeirra á fjárhag heimilanna og aðgerðaleysi stjórnvalda. Stjórn Hagsmunasamtaka heimilanna tók þátt í mótmælunum og Ásthildur Lóa Þórsdóttir, formaður samtakanna og alþingiskona fyrir Flokk fólksins sendi frá sér skoðanagrein á Vísi með Ragnari Þór Ingólfssyni daginn fyrir viðburðinn. Í grein þeirra voru áhrif verðbólgu á fjárhag heimila og lánþega harðlega gagnrýnd. Hér er grein Ragnars Þórs Ingólfssonar og Ásthildar Lóu Þórsdóttur:

Lesa áfram...

Í stríði gegn heimilunum

22 August 2024 ~

Vaxtaákvörðun Seðlabankans í gær er ekkert annað en stríðsyfirlýsing gegn heimilum landsins. Hvergi á byggðu bóli voga seðlabankar sér að fara gegn heimilum landsins með viðlíka hætti og hér og hvergi á byggðu bóli hefur verðbólgan haldist jafn há og hér. Hvert mannsbarn með vott af skynsemi ætti að sjá að vaxtahækkanir Seðlabankans hafa fyrir löngu síðan snúist upp í andhverfu sína og auka beinlínis vandann sem þær eiga að glíma við. Fyrir hverja er verið að berjast við verðbólguna ef ekki fyrir fólkið í landinu?

Fólkið í landinu er ekki til fyrir fjármálafyrirtækin og líf þess á ekki að snúast um að fóðra þau.

Aðgerðaleysi ríkisstjórnar Bjarna Benediktssonar og þar áður þessarar sömu ríkisstjórnar Katrínar Jakobsdóttur, gagnvart þessu áhlaupi á heimilin er óverjandi, en því miður ekki fordæmalaust.

Lesa áfram...

Við krefjumst tafarlausrar vaxtalækkunar

28 June 2024 ~

Ársverðbólga er nú 5,8% og hefur ekki mælst lægri í tvö og hálft ár eða frá ársbyrjun 2022. Þá voru meginvextir Seðlabanka Íslands 2% en hafa síðan hækkað í 9,25% þar sem þeir hafa nú staðið í 10 mánuði, sem verða að óbreyttu orðnir 12 þegar næsta vaxtaákvörðun er á dagskrá 21. ágúst, þrátt fyrir að verðbólgan hafi lækkað um 43% frá því að hún náði hámarki í febrúar 2023.

Seðlabankinn er fyrir löngu komin á algjörar villigötur með hávaxtastefnu sinni sem ekki stenst nokkra skoðun auk þess að valda heimilum og fyrirtækjum landsins stórfelldum skaða, sem þau verða lengi að jafna sig á.

Húsnæðisverð hefur verið stærsti drifkraftur verðbólgunnar og eina leiðin til að halda aftur af hækkun þess er að auka framboð húsnæðis. Vegna íþyngjandi fjármagnskostnaðar hefur samt dregið úr nýbyggingum og vaxtastefnan er þannig beinlínis farin að vinna gegn tilgangi sínum.

Lesa áfram...

Spurt og svarað um vaxtamálin

19 June 2024 ~

Hvað eru “vaxtamálin”?

Vaxtamálin er samheiti sem má segja sem svo að nái yfir málaferli sem hafa staðið yfir um nokkra hríð um lögmæti skilmála um breytilega vexti í lánum neytenda á Íslandi.

Hvert er helsta álitaefnið?

Neytendur og samtök þeirra sem standa að málunum telja að í all flestum tilvikum séu þeir skilmálar sem kveða á um breytilega vexti í neytendalánum og fasteignalánum til neytenda ekki í samræmi við lög og reglur. Í einfölduðu máli standist skilmálarnir ekki þær kröfur sem verður að gera um skýrleika, aðgengileika, hlutlægni og sannreynanleika, svo neytendur geti áttað sig á þýðingu þeirra og þar með umfangi þeirra fjárhagslegu skuldbindinga sem þeir gangast undir þegar þeir taka lán.

Lesa áfram...

Vaxtastuðningur dropi í hafið

05 June 2024 ~

Vaxtastuðningur ríkisstjórnarinnar er í skötulíki eins og annar „stuðningur“ hennar við heimilin. Hann er í fyrsta lagi varla upp í nös á ketti í samanburði við þann gríðarlega vaxtakostnað sem hefur verið lagður á skuldug heimili landsins og í öðru lagi er honum ráðstafað beint til lánveitenda sem greiðsla inn á höfuðstól fasteignalána.

Hagsmunasamtök heimilanna gagnrýndu strax í umsögn sinni um málið að upphæðin greiddist sjálfkrafa inn á höfuðstól húsnæðislána sem lækkar greiðslubyrði þeirra mjög lítið. Sem dæmi myndu mánaðarlegar greiðslur af dæmigerðu 50 milljón króna óverðtryggðu láni aðeins lækka um á bilinu 1.300-2.300 krónur með þessu.

Þetta er dropi í hafið og mun ekki bjarga miklu fyrir heimili sem glíma við greiðslubyrði sem hefur hækkað um hundrað sinnum hærri upphæðir á mánuði. Stjórnvöld ættu miklu frekar að einbeita sér að því að lækka vaxtagjöld heimilanna en að færa almannafé aftur til skattgreiðenda með svona sjónhverfingum og kalla það “stuðning”.

Lesa áfram...

Dómstólar baki ríkinu ekki bótaskyldu

29 May 2024 ~

Hagsmunasamtök heimilanna fagna áliti EFTA dómstólsins um túlkun á þeim reglum sem gilda um lánaskilmála sem kveða á um breytilega vexti. Þó að um álit sé að ræða verða íslenskir dómstólar að fylgja því, enda geta þeir annars gert íslenska ríkið bótaskylt.

Hagsmunasamtök heimilanna leggja áherslu á að:

Álitið gefur afdráttalaust til kynna að umræddir skilmálar séu óréttmætir.
Lánveitendur sem sömdu hina óréttmætu skilmála bera sjálfir ábyrgð á því.
Óréttmætum skilmálum skal víkja til hliðar en samningarnir gilda að öðru leyti án breytinga.
Lánveitendum ber að endurgreiða með dráttarvöxtum allt fé sem þeir hafa oftekið á grundvelli óréttmætra skilmála, umfram þá vexti sem komu fram í samningi frá upphafi.
Endurkröfuréttur neytenda skal gilda að minnsta kosti jafn lengi og samningarnir.
Hafi neytandi einhverntíma greitt lægri vexti en upphaflega komu fram í samningi skal fullnaðarkvittun gilda.

Því miður hefur sagan sýnt að þegar fjármálafyrirtæki brjóta á réttindum neytenda, virðast dómstólar leita allra leiða til að leysa þá undan ábyrgð. Hagsmunasamtök heimilanna ítreka því að slík háttsemi getur bakað ríkinu bótaskyldu á kostnað almennings. Samtökin vonast til þess að nú muni dómstólar aðeins dæma eftir lögunum með rétt neytenda í fyrirrúmi eins og þeim ber skylda til.

Lesa áfram...

Leigumarkaðurinn og húsnæðisliður vísitölunnar

05 April 2024 ~

Í tíð þessarar ríkisstjórnar hefur sífellt hallað undan fæti hjá heimilum landsins. Stjórn Hagsmunasamtaka heimilanna vill lýsa yfir fullum stuðningi við baráttu Samtaka leigjenda.

Ástandið á leigumarkaðnum er vægast sagt hræðilegt. Það er ekki of djúpt í árina tekið að segja að hann einkennist af stjórnleysi, kerfisbundinni fjárkúgun og misbeitingu á varnarlausum leigjendum, sem einhversstaðar þurfa höfði sínu að halla.

Þessu ástandi hefur verið mætt af ámælisverðu skeytingarleysi af hendi stjórnvalda og ekki nóg með það, heldur er það við þennan ógnarmarkað sem hlítir engri stjórn sem Hagstofan vill miða húsnæðislið vísitölunnar, sem nær augljóslega ekki nokkurri átt.

Lesa áfram...

Ársskýrsla 2023-2024

19 February 2024 ~

Samkvæmt venju eru fundargögn birt á heimasíðu samtakanna í aðdraganda aðalfundar í formi ársskýrslu. Félagsmenn eru minntir á aðalfundinn kl. 20:00 fimmtudaginn 22. febrúar 2024, í Mannréttindahúsinu við Sigtún 42, 105 Reykjavík. Þegar framboðsfrestur rann út höfðu borist eftirfarandi tilkynningar um framboð til stjórnar.

Lesa áfram...

Subscribe to this RSS feed

Símatími

Hafa samband

Á döfinni

Ársskýrsla 2024-2025

Aðalfundur 2025

Hvatning til þátttöku - framboð félagsmanna!

Breyting á stjórn Hagsmunasamtaka heimilanna