Hagsmunasamtök heimilanna og Samtök lánþega fóru með sendinefnd til Brussel til að fylgja eftir ESA kvörtun samtakanna og hefur nefndin nú snúið aftur frá vel heppnaðri ferð. Tilgangur ferðarinnar var að fylgja eftir kvörtuninni með persónulegri hætti en hægt er með bréfaskrifum einum saman. 6 manns voru í sendinefndinni, Ólafur Garðarsson fór fyrir Hagsmunasamtök heimilanna en Margrét Tryggvadóttir alþingismaður fór fyrir hópnum sameiginlega. Í ferðinni var einnig ráðgjafi samtakanna í evrópurétti auk talsmanns hópsins og lagalegs ráðgjafa, Björns Þorra Viktorssonar hrl. Fundað var með fulltrúum ESA og kvörtunin yfirfarin í mæltu máli. Persónuleg yfirferð sem þessi er nauðsynleg til að fullvissa okkur um að skilningur væri til staðar á inntaki kvörtunarinnar. Sendinefndin var sammála um að fundurinn hefði verið nauðsynlegur og gagnlegur.

Á myndinni fagnar Björn Þorri Viktorsson vel heppnaðri ferð í landganginum á heimleið.
Sendinefndin hitti einnig fulltrúa Evrópuþingsins sem sýndu málefninu mikinn skilning og var augljóst að þau höfðu kynnt sér kvörtunina vel. Fulltrúar Evrópuþingsins gáfu mjög skýrt til kynna að svona gæti ekki gerst innan Evrópusambandsins og að pólitískum þrýstingi yrði beitt til að fá fram réttlæti fyrir íslenskan almenning.
Allir fundirnir í Brussel fengust á einum degi og var síðasti fundurinn með fulltrúum framkvæmdastjórnar ESB, nánar tiltekið með inngöngunefnd fyrir Ísland. Erfitt er að ráða í viðbrögð fulltrúanna en fundurinn var reyndar fyrst og fremst til að upplýsa framkvæmdastjórnina um kvörtunina þar sem hún getur hugsanlega haft áhrif á inngönguferli Íslands í Evrópusambandið.
Full ástæða er til bjartsýni, enda er lagalegur grundvöllur kvörtunarinnar traustur. Réttur neytenda er skýr í Evrópurétti en breytingar á vöxtum neytendalána brýtur klárlega á rétti lántakenda að áliti lögfræðiráðgjafa HH svo ekki sé minnst á afturvirka endurútreikninga lánanna.