FRÉTTATILKYNNING
HH2012V3.2F1
27.09.2012
Málsókn gegn Íbúðalánasjóði vegna verðtryggðs láns
Birt hefur verið stefna fyrir Héraðsdómi Reykjavíkur í málsókn á hendur Íbúðalánasjóði sem er sú fyrsta vegna verðtryggðs fasteignaláns. Stefnan markar tímamót í baráttunni gegn verðtryggingu fasteignaveðlána. Hagsmunasamtök heimilanna (HH) hafa staðið að undirbúningi málsins og munu nánari upplýsingar um framgang þess birtast á heimasíðu samtakanna (www.heimilin.is).
HH hafa frá upphafi barist gegn verðtryggingu og bent á að verðtryggðir lánasamningar séu í raun flóknir afleiðusamningar sem gera neytendum ómögulegt að gera sér grein fyrir heildarlántökukostnaði yfir samningstímabilið.
Í málssókn þeirri sem nú er hafin gegn Íbúðalánasjóði vegna verðtryggðs fasteignaláns er byggt á lögum um neytendalán (nr. 121/1994), þar sem skýrt er kveðið á um að tæmandi upplýsingar um heildarlántökukostnað skuli liggja fyrir við undirritun lánasamninga, miðað við raunverulegar forsendur. Eftir gagngera úttekt með lögfræðingum á verðtryggðum lánasamningum telur stjórn samtakanna sýnt að slíkir samningar gangi sannanlega gegn ákvæðum neytendalánalaga um skýra upplýsingagjöf til neytenda.
Það kann ef til vill að koma spánskt fyrir sjónir að lánsform sem notað hefur verið til margra ára hér á landi geti reynst ólögmætt. Þá er kannski við hæfi að minnast þess þegar stjórn Hagsmunasamtaka heimilanna ásamt lögmönnum, komst að þeirri niðurstöðu í ársbyrjun 2009 að gengistryggð lán sæmræmdust ekki gildandi lögum, eins og Hæstiréttur Íslands staðfesti loks þann 16. júní 2010. Rétt eins og þá er að þessu sinni um að ræða mikilvægt prófmál sem getur haft mikla þýðingu fyrir þann mikla fjölda íslenskra heimila sem sitja uppi með stökkbreytt verðrtyggð lán eftir vísitöluhækkanir í kjölfar bankahrunsins.
f.h. Stjórnar Hagsmunasamtaka heimilanna
Ólafur Garðarsson, formaður stjórnar
