Símatími

Mán - þri kl. 10-13

Á döfinni

Rannsóknar krafist á aðkomu SFF að samráði vegna Hæstaréttardóms nr. 600/2011

HH hafa beint formlegu erindi til Samkeppniseftirlitsins með ósk um að hafin verði rannsókn á aðkomu Samtaka fjármálafyrirtækja (SFF) að samstarfi fjármálafyrirtækja og opinberra aðila í kjölfar dóms Hæstaréttar í máli nr. 600/2011 um fullnaðargildi kvittana o.fl.



Forsaga málsins er sú að í febrúar síðastliðnum óskuðu Samtök Fjármálafyrirtækja eftir undanþágu frá bannákvæðum samkeppnislaga, vegna samráðs fjármálafyrirtækja um endurútreikning, málaferli og ýmis úrlausnarefni vegna óskuldbindandi samningsákvæða um gengistryggingu.

Þann 9. mars sl. féllst Samkeppniseftirlitið með ákvörðun sinni nr. 4/2012 á veitingu takmarkaðrar undanþágu fyrir slíku samstarfi. Að fengnum athugasemdum, þar á meðal frá Hagsmunasamtökum heimilanna, voru hinsvegar lögð afmarkandi skilyrði fyrir undanþágunni, ásamt viðurlögum við brotum á þeim. Ákvörðunin veitir aðeins fjármálafyrirtækjum sem stundað hafa útlánastarfsemi undanþágu, og í ákvörðunarorðum er áréttað bann við þátttöku samtaka fjármálafyrirtækja í samstarfinu að öðru leyti en að þeim sé heimilt að útvega fundaraðstöðu og ritara.

Hagsmunasamtök heimilanna hafa heimildir fyrir því og rökstuddan grun um að þátttaka Samtaka fjármálafyrirtækja hafi í reynd orðið talsvert meiri en skilyrði Samkeppniseftirlitsins fyrir veitingu undanþágunnar kveða á um. Er sá grunur meðal annars studdur af ummælum sem fallið hafa í viðtölum fjölmiðla við forstjóra Fjármálaeftirlitsins, Umboðsmanns skuldara, auk upplýsinga sem fram koma í fréttatilkynningum frá embættinu og Samtökum Fjármálafyrirtækja.

Af þessum sökum hafa Hagsmunasamtök heimilanna óskað eftir því við Samkeppniseftirlitið að hafin verði rannsókn á aðkomu SFF að samráði fjármálafyrirtækja, Umboðsmanns skuldara o.fl. í kjölfar dóms Hæstaréttar þann 15. febrúar síðastliðinn, með hliðsjón af því hvort farið hafi verið á svig við skilyrði fyrir ákvörðun eftirlitsins um veitingu undanþágu til samstarfsins.

Tilvísanir:

Samkeppniseftirlitið 9.3.2012 - Ákvörðun nr. 4/2012 um veitingu undanþágu vegna samstarfs í kjölfar dóms Hæstaréttar í máli nr. 600/2011:

RÚV 3.6.2012 - Viðtal við Umboðsmann skuldara

Bylgjan 5.7.2012 - Viðtal við forstjóra FME (3:45)

Samhljóða og samtíma fréttatilkynningar UMS og SFF um stöðu mála í samráðinu:
http://www.ums.is/fraedsla-og-frettir/nr/354
http://www.sff.is/frettir/frettir/nr/891

Umboðsmaður skuldara 16.8.2012, fréttatilkynning

Erindið til Samkeppniseftirlitsins má lesa í heild sinni hér

Sigtúni 42
105 Reykjavík
ICELAND

(+354) 546 1501
heimilin@heimilin.is

Hvers vegna?

Tilgangur samtakanna er að veita fólkinu í landinu möguleika til að sameinast og að taka þátt í að verja hagsmuni heimilanna, og vera talsmaður og málsvari í umræðum um hagsmuni heimilanna.

Styrkir

Viltu styrkja samtökin?
Kennitala:
520209-2120
Reikningsnúmer:
1110-26-5202

Smelltu hér til að skrá þig í samtökin.