Símatími

Mán - þri kl. 10-13

Á döfinni

Hrunið er óuppgert

Hrunið er óuppgert

Formaður Hagsmunasamtaka heimilanna Ásthildur Lóa Þórsdóttir og nýr alþingismaður Flokks fólksins var í viðtali í Morgunblaðinu 31. janúar síðastliðinn. Það er óneitanlega fagnaðarefni að kröftugur málsvari og baráttumanneskja fyrir málstað samtakanna veki athygli fjölmiðla á málefnum sem hafa í raun og veru tekið rúman áratug að komast að í opinberri umræðu. Málefnum sem mætt hefur verið lengi með þöggun og fyrirstöðu gegn þeirri kröfu að raunverulegar afleiðingar efnahagshrunsins verði rannsakaðar. Málstaður Hagsmunasamtaka heimilanna snýst því ekki síst um bætta réttarstöðu lántakenda og óháða hagsmunagæslu en baráttan myndar sprungur i vegginn, eins og viðmælandi orðar það í viðtalinu. 

Vald bankanna er mikið

Meðal þess sem fjallað er um í Morgunblaðsviðtalinu eru þau tíu lagafrumvörp sem þingmaðurinn hefur lagt fram á Alþingi frá því það kom saman í desember.

Frumvörpin varða öll málefni heimilanna í fasteignaviðskiptum og önnur hagsmunamál neytenda á fjármálamarkaði. Það má með sanni segja að baráttumál samtakanna hafi átt á brattann að sækja í þjóðfélaginu og eitt nærtækt dæmi er afnám verðtryggingar lána til neytenda. Vald bankanna er mikið og gagnrýnin umræða á starfsemi þeirra hefur hingað til ekki átt mikið upp á pallborðið. Samtökin spyrja þó hvort það sé, til dæmis eðlilegt að bankarnir hagnist svo mikið sem raun ber vitni í kreppu og heimsfaraldri? Eða er eðlilegt að enn sé ekki búið að rannsaka langvinnar félagslegar afleiðingar gjaldþrotanna og fjármálahrunsins í heild sinni? Samtökin hafa í rúman áratug unnið að úrlausn mála fyrir félagsmenn og aðstoðað eftir bestu getu í málum sem öll eiga það sameiginlegt að eiga rætur sínar í efnahagshruninu. En dropinn holar steininn og eftir langvinna baráttu fyrir opnari umræðu um áhrif fjármálahrunsins á venjulegt fólk er kröftugur málsvari af vettvangi Hagsmunasamtaka heimilanna kominn á Alþingi.

Ásthildur Lóa Þórsdóttir hefur verið formaður samtakanna frá árinu 2017 og hefur sýnt það að hún gefst ekki upp á því að tala fyrir umbótum og bættum réttindum lántakenda á fjármálamarkaði, líka á Alþingi. Af nægu er að taka. 

Hagsmunasamtök heimilanna

 




Sigtúni 42
105 Reykjavík
ICELAND

(+354) 546 1501
heimilin@heimilin.is

Hvers vegna?

Tilgangur samtakanna er að veita fólkinu í landinu möguleika til að sameinast og að taka þátt í að verja hagsmuni heimilanna, og vera talsmaður og málsvari í umræðum um hagsmuni heimilanna.

Styrkir

Viltu styrkja samtökin?
Kennitala:
520209-2120
Reikningsnúmer:
1110-26-5202

Smelltu hér til að skrá þig í samtökin.