Greiðslumat á hvorki að hindra úrræði til að lækka greiðslubyrði né endurfjármögnun.
Fréttir af samtökunum
Stjórn Hagsmunasamtaka heimilanna hvetur forystufólk flokka á Alþingi til að sjá til þess að frumvarp utanríkisráðherra um breytingu á lögum um Evrópska efnahagssvæðið, þskj. 85 - 85. mál, kennt við bókun 35, hljóti afgreiðslu fyrir þinglok á yfirstandandi þingi. Eins og kunnugt er snýst málið um að lagaákvæði sem réttilega innleiða skuldbindingar samkvæmt EES-samningnum gangi framar öðrum ósamrýmanlegum lagaákvæðum og það sama gildi um stjórnvaldsfyrirmæli (t.d. reglugerðir).
Fjölmörg mál eru nú komin eða á leið fyrir dómstóla þar sem reynir á slíkar reglur er varða gríðarlega hagsmuni tugþúsunda neytenda og almennra borgara hér á landi. Afar mikilvægt er að hlutaðeigandi einstaklingar geti treyst því að reglur sem þeir eiga að geta byggt réttindi sín á, haldi þegar á reynir og geti ekki þurft að víkja fyrir öðrum lakari reglum sem kynnu að stangast á við þær.
Jafnframt eru gríðarlegir almannahagsmunir í húfi því ef einkaaðilar geta komist upp með brot gegn réttindum íslenskra neytenda sem leiða af EES-samningnum vegna annmarka á íslenskri löggjöf, getur íslenska ríkið orðið skaðabótaskylt fyrir tjón sem hlýst af því. Hættan á því að slíkar byrðar geti fallið af herðum brotlegra aðila yfir saklausa skattgreiðendur er óásættanleg og verður að afstýra.
Að sjálfsögðu má aðeins gera kröfu um það eitt að hver og einn þingmaður fylgi sannfæringu sinni í hverju máli fyrir sig. Við förum ekki heldur fram á annað en að það verði gert í þessu tiltekna máli með því að taka það til afgreiðslu og leiða til lykta með atkvæðagreiðslu. Fulltrúar þingflokka hafa nú þegar komið afstöðu sinni til málsins rækilega á framfæri og er því ekki eftir neinu að bíða.
Til verndar heildarhagsmunum neytenda,
stjórn Hagsmunasamtaka heimilanna
Skrifstofa Hagsmunasamtaka heimilanna er lokuð í júlímánuði. Starfsmenn samtakanna eru í sumarleyfi. Við viljum biðja þau sem þurfa á ráðgjafarþjónustu Hagsmunasamtaka heimilanna að halda að sýna biðlund og hafa samband í byrjun ágúst. Á vefsíðu okkar má finna upplýsingar um þjónustu Hagsmunasamtaka heimilanna fyrir þau sem hafa áhuga á að óska eftir aðstoð. Við tökum vel á móti öllum sem til okkar leita og stöndum vörð um hagsmunamál félagsmanna.
Aðalfundur Hagsmunasamtaka heimilanna 2025 var haldinn 20. febrúar síðastliðinn. Á fundinum var kosin ný stjórn sem hefur nú skipt með sér verkum og er skipuð þannig:
- Guðmundur Ásgeirsson formaður
- Sigríður Örlygsdóttir varaformaður
- Guðrún Bryndís Harðardóttir gjaldkeri
- Jónas Yngvi Ásgrímsson ritari
- Guðrún Hulda Ólafsdóttir meðstjórnandi
Samkvæmt venju eru fundargögn birt á heimasíðu samtakanna í aðdraganda aðalfundar í formi ársskýrslu. Félagsmenn eru minntir á aðalfundinn kl. 20:00 fimmtudaginn 20. febrúar 2025, í Mannréttindahúsinu við Sigtún 42, 105 Reykjavík. Þegar framboðsfrestur rann út höfðu borist eftirfarandi tilkynningar um framboð til stjórnar.
Hagsmunasamtök heimilanna boða hér með til aðalfundar, fimmtudagskvöldið 20. febrúar 2025 kl. 20:00, í Mannréttindahúsinu við Sigtún 42, í Reykjavík. Skrifstofa samtakanna er nú í húsi ÖBÍ, ásamt ýmsum félagasamtökum sem starfa að réttindamálum almennings. Aðalfundur verður haldinn í miðrými hússins og gengið er inn um aðaldyr við vesturenda byggingarinnar.
Dagskrá:
- Skipun fundarstjóra, ritara, og fundarsetning
- Skýrsla stjórnar: Guðmundur Ásgeirsson, formaður
- Reikningar samtakanna: Guðrún Harðardóttir, gjaldkeri
- Tillaga stjórnar um ákvörðun félagsgjalda
- Tillögur um breytingar á samþykktum
- Kosning stjórnarmanna
- Kosning varamanna
- Kosning skoðunarmanna
- Önnur mál
Framboðsfrestur til stjórnarkjörs er 7 dögum fyrir aðalfund eða til 13. febrúar kl. 20:00. Framboð má tilkynna með tölvupósti á netfang samtakanna:
ATHUGIÐ! Ef staðfesting á móttöku framboðs berst ekki í svari frá samtökunum, vinsamlegast tryggið þá móttöku þess með símtali til Hagsmunasamtaka heimilanna, í númerið 546-1501 á milli 10 og 14 alla virka daga.
Einnig er óskað eftir tilnefningum skoðunarmanna og sjálfboðaliðum í talningu atkvæða á fundinum. Fundargögn verða birt á heimasíðu samtakanna www.heimilin.is í aðdraganda aðalfundarins.
Hvatning til þátttöku - framboð félagsmanna!
Hefur þú áhuga á að taka þátt í starfi Hagsmunasamtaka heimilanna? Um átta þúsund félagsmenn eru í Hagsmunasamtökum heimilanna. Félagsmenn geta boðið fram starfskrafta sína með því að senda tilkynningu um framboð í tölvupósti á skrifstofu samtakanna. Samtökin hafa lengi starfað lýðræðislega að hagsmunamálum lántakenda og heimilanna í landinu, með áherslu á húsnæðismál og kröfur um sanngjörn lánsskilyrði í þágu almennings og réttlátara þjóðfélags.
Samtökin reka óháða ráðgjafaþjónustu og hagsmunagæslu fyrir félagsmenn, fylgjast grannt með störfum stjórnvalda og þróun löggjafar, senda frá sér umsagnir um hin ýmsu mál, tilkynningar til fjölmiðla þegar við á og margt fleira. Fráfarandi stjórn hvetur þá félagsmenn Hagsmunasamtaka heimilanna sem hafa áhuga á, eða búa yfir þekkingu á baráttumálum samtakanna, til þess að gefa kost á sér í stjórnarstarf.
Hagsmunasamtök heimilanna eru skráð hjá fyrirtækjaskrá sem almannaheillafélag samkvæmt lögum um félög til almannaheilla og á almannaheillaskrá Skattsins.
Með góðri kveðju,
Stjórn Hagsmunasamtaka heimilanna
Ásthildur Lóa Þórsdóttir, formaður Hagsmunasamtaka heimilanna, hefur sagt sig úr stjórn samtakanna og þar með frá formennsku. Ásthildur Lóa sagði sig úr stjórninni 22. desember 2024 þegar hún tók við embætti Mennta- og barnamálaráðherra í nýrri ríkisstjórn Íslands. Stjórn Hagsmunasamtaka heimilanna þakkar Ásthildi Lóu fyrir vel unnin störf í þágu samtakanna á liðnum árum og óskar henni hjartanlega til hamingju með hina nýju stöðu.
Guðmundur Ásgeirsson, varaformaður, gegnir hlutverki formanns Hagsmunasamtaka heimilanna fram að næsta aðalfundi sem er fyrirhugaður 20. febrúar næstkomandi.
Stjórn Hagsmunasamtaka heimilanna ályktar að fráfarandi ríkisstjórn hafi brugðist því hlutverki sínu að standa vörð um heimilin og verja þau fyrir íþyngjandi áhrifum verðbólgu og vaxtahækkana á greiðslubyrði húsnæðisskuldbindinga almennings. Skortur á framsýni í húsnæðismálum hefur leitt til framboðsskorts og stjórn efnahagsmála brugðist með þeim afleiðingum að sífellt molnar undan þeim sjálfsögðu mannréttindum allra að eiga kost á viðunandi húsnæði á viðráðanlegum kjörum.
Ítrekaðar áskoranir
Hagsmunasamtök heimilanna voru meðal þeirra fyrstu til að sjá blikur á lofti fyrir fjórum árum og hafa síðan þá beint ítrekuðum áskorunum til stjórnvalda um að ráðast í aðgerðir til þess að verja heimilin. Því miður hefur lítið verið tekið mark á þessum aðvörunum og afleiðingarnar blasa við. Nú þegar kosningar eru á næsta leyti hvetjum við því kjósendur til að ráðstafa atkvæðum sínum eins og þeim þykir þau nýtast best í þágu heimilanna. Við hvetjum landsmenn þó til að horfa til verka og gjörða og hvaða stjórnmálaflokkar hafa sýnt það með fyrri verkum að þeir starfa skilyrðislaust að hagsmunamálum heimilanna.
Nokkrar áskoranir og tilkynningar Hagsmunasamtaka heimilanna frá 2020-2024:
26.03.2020: Tryggjum heimilunum skjól undir öruggu þaki
15.09.2020: ÍTREKUN-Tryggjum heimilunum skjól undir öruggu þaki
19.05.2020: Eiga bankar að hagnast á Covid-19?
02.09.2021: Bankarnir skulda heimilunum lægri vexti
15.12.2021: Aðvörun til neytenda vegna vaxtabreytinga Íslandsbanka
09.05.2022: Tryggjum að enginn missi heimili sitt vegna verðbólgu og vaxtahækkana!
10.08.2022: Aðgerðir gegn verðbólgunni verri en verðbólgan sjálf
20.09.2022: Fátækragildra verðtryggðra lána
01.05.2023: Heimilin eiga að vera friðhelg
05.06.2024 Vaxtastuðningur dropi í hafið
28.06.2024 Við krefjumst tafarlausrar vaxtalækkunar
22.08.2024 Í stríði gegn heimilunum
Kjósum með heimilunum!
Stjórn Hagsmunasamtaka heimilanna
Á björtu og köldu haustsíðdegi við þingsetningu Alþingis 10. september síðastliðinn stóðu stéttarfélög og heildarsamtök launafólks sameinuð að mótmælum við Austurvöll. Alþýðusamband Íslands, BSRB og Kennarasamband Íslands mótmæltu aðgerðaleysi stjórnvalda í efnahagsmálum. Ragnar Þór Ingólfsson, formaður VR var fundarstjóri og ræðumenn voru Magnús Þór Jónsson, formaður KÍ, Sonja Þorbergsdóttir, formaður BSRB, Halla Gunnarsdóttir, varaformaður VR og Þórarinn Eyfjörð, formaður Sameykis. Um fimmhundruð mótmælendur voru mættir til að hlýða á formenn stéttarfélaganna. Formaður VR og fundarstjóri talaði um tímamótamótmæli heildarsamtaka launafólks og gagnrýni á stöðu efnahagsmála, áhrif þeirra á fjárhag heimilanna og aðgerðaleysi stjórnvalda. Stjórn Hagsmunasamtaka heimilanna tók þátt í mótmælunum og Ásthildur Lóa Þórsdóttir, formaður samtakanna og alþingiskona fyrir Flokk fólksins sendi frá sér skoðanagrein á Vísi með Ragnari Þór Ingólfssyni daginn fyrir viðburðinn. Í grein þeirra voru áhrif verðbólgu á fjárhag heimila og lánþega harðlega gagnrýnd. Hér er grein Ragnars Þórs Ingólfssonar og Ásthildar Lóu Þórsdóttur:
Vaxtaákvörðun Seðlabankans í gær er ekkert annað en stríðsyfirlýsing gegn heimilum landsins. Hvergi á byggðu bóli voga seðlabankar sér að fara gegn heimilum landsins með viðlíka hætti og hér og hvergi á byggðu bóli hefur verðbólgan haldist jafn há og hér. Hvert mannsbarn með vott af skynsemi ætti að sjá að vaxtahækkanir Seðlabankans hafa fyrir löngu síðan snúist upp í andhverfu sína og auka beinlínis vandann sem þær eiga að glíma við. Fyrir hverja er verið að berjast við verðbólguna ef ekki fyrir fólkið í landinu?
Fólkið í landinu er ekki til fyrir fjármálafyrirtækin og líf þess á ekki að snúast um að fóðra þau.
Aðgerðaleysi ríkisstjórnar Bjarna Benediktssonar og þar áður þessarar sömu ríkisstjórnar Katrínar Jakobsdóttur, gagnvart þessu áhlaupi á heimilin er óverjandi, en því miður ekki fordæmalaust.
Ársverðbólga er nú 5,8% og hefur ekki mælst lægri í tvö og hálft ár eða frá ársbyrjun 2022. Þá voru meginvextir Seðlabanka Íslands 2% en hafa síðan hækkað í 9,25% þar sem þeir hafa nú staðið í 10 mánuði, sem verða að óbreyttu orðnir 12 þegar næsta vaxtaákvörðun er á dagskrá 21. ágúst, þrátt fyrir að verðbólgan hafi lækkað um 43% frá því að hún náði hámarki í febrúar 2023.
Seðlabankinn er fyrir löngu komin á algjörar villigötur með hávaxtastefnu sinni sem ekki stenst nokkra skoðun auk þess að valda heimilum og fyrirtækjum landsins stórfelldum skaða, sem þau verða lengi að jafna sig á.
Húsnæðisverð hefur verið stærsti drifkraftur verðbólgunnar og eina leiðin til að halda aftur af hækkun þess er að auka framboð húsnæðis. Vegna íþyngjandi fjármagnskostnaðar hefur samt dregið úr nýbyggingum og vaxtastefnan er þannig beinlínis farin að vinna gegn tilgangi sínum.
Hvað eru “vaxtamálin”?
Vaxtamálin er samheiti sem má segja sem svo að nái yfir málaferli sem hafa staðið yfir um nokkra hríð um lögmæti skilmála um breytilega vexti í lánum neytenda á Íslandi.
Hvert er helsta álitaefnið?
Neytendur og samtök þeirra sem standa að málunum telja að í all flestum tilvikum séu þeir skilmálar sem kveða á um breytilega vexti í neytendalánum og fasteignalánum til neytenda ekki í samræmi við lög og reglur. Í einfölduðu máli standist skilmálarnir ekki þær kröfur sem verður að gera um skýrleika, aðgengileika, hlutlægni og sannreynanleika, svo neytendur geti áttað sig á þýðingu þeirra og þar með umfangi þeirra fjárhagslegu skuldbindinga sem þeir gangast undir þegar þeir taka lán.
Hvers vegna?
Tilgangur samtakanna er að veita fólkinu í landinu möguleika til að sameinast og að taka þátt í að verja hagsmuni heimilanna, og vera talsmaður og málsvari í umræðum um hagsmuni heimilanna.
Flýtileiðir
Styrkir
Viltu styrkja samtökin?
Kennitala:
520209-2120
Reikningsnúmer:
1110-26-5202
Smelltu hér til að skrá þig í samtökin.