Á döfinni

Hagsmunasamtök heimilanna hafa nú sent erindi til Fjármálaeftirlitsins þar sem FME er beðið um að rækja skyldur sínar varðandi eftirlit með fjármálafyrirtækjum. Samtökin hafa fengið áreiðanlegar fregnir af því að bifreiðar hafi verið fjarlægðar af einkalóðum án þess að láta eigendur þeirra vita og jafnvel hafi slíkt gertæki af hálfu vörslusviptingafyrirtækis farið fram í skjóli nætur. Vilja samtökin benda á að innheimta án starfsleyfis þar sem bílar/eigur fólks eru brottnumdar af einkalóðum í skjóli nætur, er gróft brot á stjórnarskrárvarinni friðhelgi einkalífs og heimilis.

Hagsmunasamtök heimilanna auglýsa eftir hrikalega duglegum einstakling í hlutastarf. Samtökin leita að einstaklingi sem hefur þekkingu og brennandi áhuga á málefnum samtakanna og framtíðarsýn og getur hjálpað til við að byggja upp sterk þverpólitísk samtök sem sinna hagsmunum heimilanna. Viðkomandi þarf að vera trúverðugur, heiðarlegur, málefnalegur og ákveðinn í samskiptum við þá sem þörf er á samskiptum við og hafa færni til að setja fram ritmál og talnaefni. Æskilegt er að hafa menntun eða reynslu sem nýtist í starfi, eða hafa altmuligmands hæfileika til að bera. Ráðið er í starfið frá um það bil miðjum nóvember í tímabundið starf.

Rétti tíminn til að andmæla stöðu heimila landsins er þegar Alþjóða gjaldeyrissjóðurinn, Seðlabankinn og Íslenska ríkið halda alþjóðlega ráðstefnu, montfund, um hvað rosalega vel hafi til tekist hér á landi í samstarfi þessara aðila við að koma bankakerfinu af stað eftir hrun. Dagsetningin er 27 október, á fimmtudegi í Hörpunni. Þarna er gott tækifæri fyrir venjulega Íslendinga til að segja hvað þeim finnst um hvernig þeim hafi til tekist í skuldamálum heimilanna.

Hagsmunasamtök heimilanna hafa nú boðið þingflokksformönnum og þingmönnum utan flokka á fund til sín á fimmtudagin í næstu viku til að ræða aðkomu þeirra og samvinnu við að koma þjóðaratkvæðagreiðslu á dagskrá.

Í ljósi þess að stjórnvöld hafa nú enn og aftur sýnt mikla tregðu við að viðurkenna þörfina til þess að leiðrétta stökkbreytt lán heimilanna telja samtökin þörf á því að hefja strax undirbúning þjóðaratkvæðagreiðslu.

Að auki keppast bankarnir nú við að koma út upplýsingum til fjölmiðla um að allt afskriftarsvigrúm þeirra sé uppurið. Á meðan skila þeir gríðarlegum hagnaði, eða 163 milljörðum samanlagt í þrem stærstu bönkunum. Samtökin telja að svigrúmið skuli sækja til þeirra sem hafa oftekið fé af almenningi, þar eru bankar og lífeyrissjóðir stærstu sökudólgarnir og eðlilegt að þeir skili þessu oftekna fé til baka til heimilanna. Heimilin hafa ekki svigrúm fyrir slíka okurlánastarfsemi og fjárhagslegt ofbeldi.