Á döfinni

Hagsmunasamtök heimilanna nálguðust forsætisráðherra fyrir nokkru síðan með tilbúna viljayfirlýsingu sem þau vildu ræða við stjórnvöld í framhaldi af afhendingu undirskrifta rúmlega 34 þúsund manns þann 1. okt. Komið hefur í ljós að enginn vilji er af hálfu stjórnvalda til að skrifa undir viljayfirlýsingu í hvaða útgáfu sem hún kynni að vera og er stjórn samtakanna ljóst að enginn vilji er af hálfu stjórnvalda til að stíga hið pólitíska skref sem til þarf í átt að almennum leiðréttingum lána heimilanna. Viljayfirlýsingin er birt hér.

Hagsmunasamtök heimilanna hafa nú sent erindi til Fjármálaeftirlitsins þar sem settar eru fram nokkrar af þeim spurningum sem mikið hefur verið fjallað um að undanförnu í fjölmiðlum og nýlega á borgarafundi í Háskólabíó. Samtökunum hafa borist fjölmargar fyrirspurnir frá félagsmönnum um hvernig beri að meðhöndla skuldabréf lögum samkvæmt. Hvort beri að þinglýsa þeim, hver hafi heimild til að innheimta þau og frá hvaða tíma og hvernig beri að skilja fullnaðargildi kvittana. Hafa samtökin gert sjálfstæða athugun á því og fá ekki betur séð en að á þessum atriðum séu hnökrar í núverandi framkvæmd ýmissa fjármálastofnana.

Á laugardag 15. október kl. 15:00 hefja Raddir fólksins upp raust sína undir stjórn Harðar Torfasonar. Viðburðurinn er hluti af alþjóðlegum mótmælum gegn fjármálakerfi sem hefur yfirdrifin völd án nokkurs lýðræðislegs umboðs.

Formaður HH, Andrea J Ólafsdóttir flytur erindi fyrir hönd samtakanna. Félagsmenn eru hvattir til að mæta.