Haustið 2009 sögðust um 75% hlynnt hugmyndum um almenna niðurfærslu lána.  Nú mælist stuðningur við almenna niðurfærslu íbúðalána hins vegar tæp 80%. Sérstaka athygli vekur að hlutfall þeirra sem segjast mjög hlynnt almennri niðurfærslu eykst um rúm 12%.

Þá er áhugavert að sjá að stuðningur við kröfur samtakanna er algerlega þverpólitískur, mikill meirihluti kjósenda allra flokka eru hlynntir kröfunum. Ljóst er að samtökin endurspegla vilja þjóðarinnar í þessum efnum.

Stuðningur við þjóðaratkvæðagreiðslu um kröfurnar er um 50%, en þar eru fleiri í hópi óákveðinna sem svara hvorki né.

Eins og sjá má hafa samtökin jafnframt mikinn pólitískan stuðning almennings, rúm 31% þeirra sem taka afstöðu segja líkur á því að þau myndu kjósa samtökin ef þau tækju þá ákvörðun að bjóða fram til Alþingis. Þá er stórt hlutfall, rúm 22 % að auki sem mundu hugsanlega kjósa samtökin.

Að mati stjórnar Hagsmunasamtaka heimilanna endurspegla þessar niðurstöður þann mikla og víðtæka þverpólitíska stuðning sem kröfur samtakanna njóta á meðal almennings. Stuðningur við afnám verðtryggingar mælist stöðugur en fylgi við almennar leiðréttingar lána eykst frá árinu 2009. Samtökin standa ennþá fyrir undirskriftasöfnun um þessar kröfur á www.heimilin.is.

Þess má geta að ástæða samtakanna fyrir kröfunni um þjóðaratkvæði er sú að kröfurnar hafa alla tíð haft yfirgnæfandi stuðning almennings á meðan stjórnvöld eru treg að bregðast við þeim með almennum aðgerðum. Auk þess hafa í gegnum tíðina verið lögð fram mörg frumvörp á Alþingi um afnám verðtryggingar sem fást aldrei afgreidd út úr nefndum. Líta samtökin svo á að þá sé orðið tímabært að leyfa almenningi að kjósa um þetta mikilvæga hagsmunamál fyrir heimilin í landinu.

Hér má sjá Capacent Gallup skýrsluna í heild sinni