Á döfinni

Fimmtudagurinn 26. nóvember var svartur dagur fyrir hagsmuni almennings á Íslandi, en þann dag kvað Hæstiréttur Íslands upp dóm í máli nr. 243/2015, og undirstrikaði með honum að á Íslandi er réttarríkið í molum. Umrætt mál var höfðað fyrir atbeina Hagsmunasamtaka heimilanna til að leita úrlausnar um ólögmæti verðtryggðra neytendalána samkvæmt skýrum ákvæðum íslenskra laga. Stjórnarskráin kveður á um að dómendum sé skylt að fara einungis eftir lögunum í embættisverkum sínum. Er því algjört hneyksli að það skuli ekki hafa verið gert í þessu tilviki og Hæstiréttur hafi þannig grímulaust farið þvert gegn þessum grundvallarreglum réttarríkisins.

Hagsmunasamtök heimilanna minna á að föstudaginn 20. nóvember verður mál nr. 243/2015 flutt frammi fyrir fjölskipuðum Hæstarétti Íslands. Þar með er komið að ögurstundu í þessu máli sem samtökin höfðu forgöngu að í því skyni að láta reyna á lögmæti verðtryggðra neytendalána. Þrjú ár eru liðin síðan málið var upphaflega höfðað en leið þess gegnum dómskerfið hefur verið óvenju löng og torsótt. Í febrúar síðastliðnum féll dómur héraðsdóms í málinu, þar sem var í raun fallist á að viðkomandi lánssamningur samræmdist ekki lögum um neytendalán. Hinsvegar var ekki kveðið á um neinar afleiðingar þess, og kemur því nú til kasta Hæstaréttar að taka afstöðu til þeirrar kröfu að lánið verði leiðrétt á sambærilegan hátt og lán með ólöglega gengistryggingu. Verði fallist á þá kröfu gæti það haft gríðarlega jákvæð áhrif á stöðu verðtryggðra lána heimilanna. Málflutningurinn fer fram í dómsal I og hægt verður að fylgjast með frá áhorfendapöllum, en þeim sem það vilja gera er bent á að mæta tímanlega.

Hagsmunasamtök heimilanna ítreka gagnrýni sína á vaxtahækkanir Seðlabankans, sem algjörlega gagnslausa og úrelta aðferð við að draga úr verðbólgu. Með aðgerðum sínum virðist seðlabankinn öðru fremur róa að því öllum árum að láta glórulausa verðbólguspá sína rætast.

Löngu er orðið tímabært að Seðlabankinn hætti að beita handónýtum hagstjórnartækjum sem hafa einfaldlega þveröfug áhrif við það sem ætlað er. Undanfarnar þrjár vaxtahækkanir Seðlabankans jafngilda 28% hækkun vaxtakostnaðar sem getur hæglega haft áhrif til hækkunar verðlags, ekki síður en launahækkanir.

Hagsmunasamtök heimilanna skora jafnframt á stjórnvöld og aðila vinnumarkaðsins að fordæma úreltar hagstjórnaraðgerðir Seðlabankans og þrýsta á um að hann breyti þeim og taki framvegis mið af þeim raunveruleika sem við búum við hér á landi.

Kæru félagsmenn.

Næsti opni spjallfundur vetrarins verður haldinn í Café Meskí, Fákafeni 9, þriðjudaginn 3. nóvember næstkomandi kl. 20-22. Hittumst og spjöllum saman um það sem brennur á okkur. Stjórnarmenn samtakanna verða á staðnum til að fara yfir málin með félagsmönnum. Við viljum heyra hvað ykkur liggur á hjarta. Umræðuefnið er frjálst og til dæmis má ræða um nauðungarsölur, verðtrygginguna, skuldaleiðréttingar, vaxtamál og fleira sem viðkemur málefnum heimilanna. Stefnt verður að því að halda fleiri slíka fundi í vetur.

Fundurinn verður í innri sal Café Meskí. Næg bílastæði. Gaman væri að sjá sem flesta.

Stjórn Hagsmunasamtaka heimilanna.