Á döfinni

Hagsmunasamtök heimilanna (HH) voru boðuð á fund Hagfræðistofnunar Háskóla Íslands fyrir hádegi í dag þann 17. janúar. Á fundinum voru niðurstöður og greining Hagfræðistofnunar kynntar fulltrúum HH og afhent afrit af skýrsludrögum. Skýrslan er 20 blaðsíður og hefur verið beðið eftir niðurstöðum frá í nóvember. Í tvo mánuði hefur Hagfræðistofnun unnið í skýrslunni sem er meingölluð frá upphafi til enda og vert væri að spyrja hvað þetta ævintýri hafi kostað skattborgara? HH var gefinn sólarhringur til að bregðast við og gera athugasemdir við skýrsluna áður en hún fer í birtingu. Í stuttu máli má segja að sólarhringsfresturinn einn og sér sé efni í sérstaka gagnrýni og getur hver maður séð að slíkt er varla svara vert þegar gefið var til kynna af hálfu stjórnvalda að skýrslan yrði unnin þannig að HH fengi aðgang að Hagfræðistofnun til að koma á framfæri spurningum og síðan gefið tækifæri til að koma á framfæri athugasemdum og gagnrýni áður en skýrslan birtist.

Hagsmunasamtök heimilanna (HH) áttu fund með þingmönnum síðdegis í gær í þeim tilgangi að ýta við þeim sem áhuga hafa á því að taka höndum saman á Alþingi og setja fram þingmál um kröfur samtakanna sem snúa að leiðréttingum lána, afnámi verðtryggingar eða þjóðaratkvæðagreiðslu um þær. Þeir þingmenn sem hingað til hafa lýst yfir áhuga að taka þátt í að setja málið á dagskrá þingsins koma allir úr stjórnarandstöðu.

Hagsmunasamtök heimilanna sendu á dögunum erindi til FME og kröfðust íhlutunar og nauðsynlegra svara við spurningum. Fjármálaeftirlitið (FME) hefur nú svarað erindinu er varðar meðal annars áritun og meðhöndlun skuldabréfa. Jafnframt hefur FME svarað erindi HH er varðar vörslusviptingar.

Hagsmunasamtök heimilanna hafa nú sent erindi til innanríkisráðherra, forsætisráðherra, fjármálaráðherra og efnahags- og viðskiptaráðherra þar sem þess er krafist að gefa fjölskyldum í landinu og heimilum grið og frið fyrir aðförum fjármálastofnana á grundvelli ólögmætra gengistryggðra lána sem enn ríkir mikil óvissa um. Samtökin sjá ekki hvernig er hægt að réttlæta fyrir fólki eignasviptingu með endurútreikningum á lánum sem líklegt getur talist að fáist ekki staðist fyrir dómstólum. Á þetta hafa samtökin margoft bent á, en þótti ástæða til þess að benda á það enn og aftur þar sem ekki er að sjá neina viðbragðsáætlun stjórnvalda við því ástandi er skapast á leigumarkaði og búferlaflutningum sé þetta látið viðgangast.