Samtökin Raddir fólksins efna til fundarins sem boðaður er á Austurvelli, en Hörður verður fundarstjóri.

Í 45 löndum verður mótmælt þennan sama dag og beinast þau gegn stjórn- og fjármálakerfum heimsins. Í tilkynningu frá Röddum fólksins segir að þennan dag muni milljónir manna safnast saman á torgum og mótmæla ofbeldi stjórn- og fjármálaheimsins gagnvart almenningi og krefjast þess að stjórnmálamenn taki umsvifalaust kröfur almennings fram fyrir kröfur fjármálaheimsins.

Hörður fór mikinn í búsáhaldabyltingunni svokölluðu þar sem hann skipulagði útifundi. Hann segir það ekki vera svo að byltingin sé að hefjast aftur þó að hann sé kominn fram á sjónarsviðið á Íslandi á ný, hún sé einfaldlega að halda áfram.
„Þessi bylting er um allan heiminn. Þetta hefur aldrei gerst áður í mannkynssögunni það sem er að gerast í dag. Þetta er það sem erindi mín hafa gengið út á erlendis, og reyndar hér líka, nú er kominn sá tími að við getum skipst á upplýsingum, netið gefur okkur þessi tækifæri. Stjórnmála- og fjármálamenn eru ennþá í gamla farinu, haldandi að þeir geti logið að almenningi. Þetta gengur ekki lengur,“ segir Hörður.

Á laugardaginn er einnig boðað til mótmæla af hreyfingunni Tökum torgin

Ætlunin er að koma saman á Lækjartorgi og láta í ljós andstöðu við fjármálavaldið og krefjast alvöru lýðræðis, eins og gert verður um allan heim þennan dag.

Samskonar aðgerðir hafa verið boðaðar í 662 borgum í 79 löndum um allan heim.

Tilkynning frá 15. októberhreyfingunni – Mótmæli gegn fjármálaveldi og alvöru lýðræðis krafist í 662 borgum í 79 löndum.

Sjá Facebook viðburð.

Sjá vefsíðu um viðburðinn á heimsvísu.

Hinn 15. október mun almenningur um heim allan fara út á götur og torg. Frá Ameríku til Asíu, frá Afríku til Evrópu rís fólk upp til að krefjast réttar síns og alvöru lýðræðis. Tími er kominn til að við sameinumst í friðsömum mótmælum um heim allan.

Núverandi valdhafar vinna einungis í þágu örfárra og hundsa bæði vilja meirihlutans og þann fórnarkostnað sem mannfólk og umhverfi verður að bera. Þetta er óþolandi staða sem verður að taka enda.

Við munum einum rómi gefa stjórnmálamönnunum, og fjármálaelítunni sem þeir þjóna, til kynna að það er okkar, fólksins, 99 prósentanna, að ákveða okkar eigin framtíð. Við erum ekki vörur í þeirra höndum til að höndla með, né heldur í höndum bankamannanna sem eru ekki fulltrúar okkar.

Hinn 15. október ætlum við að hittast á götum úti og hefja þær hnattrænu breytingar sem við viljum sjá. Við munum mótmæla friðsamlega, ræða saman og skipuleggja okkur þar til við náum þeim fram.

Tími er kominn til að sameinast. Tími er kominn fyrir þá að hlusta.

Almenningur um allan heim, rísum upp 15. október.