Í kjölfar dóms Hæstaréttar þann 15. febrúar síðastliðinn var fyrir hönd fjármálafyrirtækja leitað undanþágu frá bannákvæðum samkeppnislaga, til að heimila þeim samráð um endurútreikning, málaferli og ýmis úrlausnarefni vegna óskuldbindandi samningsákvæða um gengistryggingu. Þann 9. mars sl. féllst Samkeppniseftirlitið á veitingu takmarkaðrar undanþágu fyrir slíku samstarfi með ákvörðun sinni nr. 4/2012. Að fengnum athugasemdum meðal annars frá Hagsmunasamtökum heimilanna, voru þó sett ýmis skilyrði fyrir undanþágunni, og kveðið á um viðurlög við brotum.

Samkvæmt 6. gr. ákvörðunarorðanna var sett það skilyrði að meðan á samstarfinu stæði skyldu lánveitendur fresta öllum fullnustuaðgerðum sem byggja á lánum sem ljóst sé að falli undir dóm Hæstaréttar í máli nr. 600/2011. Hagsmunasamtök heimilanna hafa hinsvegar undir höndum gögn sem sýna fram á a.m.k. nokkur tilvik þar sem Drómi og Arion banki hafa haldið fullnustuaðgerðum til streitu á grundvelli slíkra lána, eftir að undanþáguskilyrðin tóku gildi. Samtökin hafa því farið fram á rannsókn Samkeppniseftirlitsins á því hvort umrædd fjármálafyrirtæki og jafnvel fleiri, kunni þannig að hafa gerst brotleg við skilyrðin og þar með við samkeppnislög.

Þess má geta að þetta er í annað skipti sem samtökin sjá sig knúin til að beina upplýsingum til Samkeppniseftirlitsins vegna meintra brota gegn skilyrðum ákvörðunar nr. 4/2012. Síðast þann 14. ágúst var það vegna vísbendinga um þátttöku Samtaka fjármálafyrirtækja í samráðinu þvert gegn skilyrðum undanþágunnar, sem Samkeppniseftirlitið hefur nú brugðist við og hafið rannsókn á.