Samkeppniseftirlitið hefur nú hafnað undanþágubeiðni SFF, en fallist á að fjármálafyrirtæki sem í hlut eiga hafi samráð um þröngt afmörkuð verkefni er lúta að viðbrögðum við áðurnefndum dómi og höfðun frekari dómsmála um úrlausnarefni sem enn standa óleyst. Þess er krafist að haldnar séu skýrar fundargerðir slíkra samráðsfunda að viðstöddum fulltrúa Umboðsmanns skuldara auk Neytendastofu og Talsmanns Neytenda óski þau eftir því.

Athygli skal vakin á því að lánveitendum sem aðild eiga að samstarfinu er gert að fresta öllum fullnustuaðgerðum vegna lána sem ljóst er að falli undir dóm Hæstaréttar. Hagsmunasamtök heimilanna telja það líklega geta átt við um flest áður gengistryggð lán, en vísa að öðru leyti til dómsorða Hæstaréttar. Þá er sett sem skilyrði fyrir samráði að fjármálafyrirtækin krefjist ekki málskostnaðar og skuli í dómsmálum sem höfðuð verði í kjölfarið leitast eftir málum þar sem skuldarar eru að mati umboðsmanns skuldara hvað best til þess fallnir að halda uppi vörnum.

Hagsmunasamtök heimilanna fagna því að Samkeppniseftirlitið skuli taka tillit til heildarhagsmuna neytenda í ákvörðun sinni og hafi komið að hluta til móts við þau sjónarmið sem samtökin settu fram í umsögnum sínum. Samtökin ítreka að ýtrasti réttur neytenda skuli virtur í hvívetna og neytendur njóti ávallt vafans eins og lög gera ráð fyrir. Þá skal tekið fram að félagsfundur samtakanna samþykkti um helgina ályktun þess efnis að lögfræðiálit verði unnið vegna dómsins og lögfræðilegra álitaefna.

Dómur Hæstaréttar Íslands í máli nr. 600/2011
Ákvörðun Samkeppniseftirlitsins nr. 4/2012 um undanþágu vegna samstarfs