Stunduðu bílafjármögnunarfyrirtækin stórfelld virðisaukaskattsvik?
Svo virðist að satt sé að því stærri sem glæpurinn er því erfiðara er að koma honum á framfæri og fá af stað rannsókn málsins. Þetta kann að eiga við um mál sem byrjaði 2010 þegar Þórdís Björk Sigurþórsdóttir fór að leita að reikningi frá Sp-fjármögnun fyrir bifreiðakaupum. Engan reikning var að finna í skjalasafni svo Þórdís bað um afrit frá SP en þá kom ýmislegt í ljós sem vakti grunsemdir Þórdísar. Eftirfarandi er útdráttur úr grein Þórdísar frá því í febrúar 2011 en við viljum vekja athygli á þessu máli því RSK virðist ekki hafa talið tilefni til að rannsaka þetta mál hvernig sem á því stendur.
"Gefum okkur að þessi þrjú fyrirtæki hafi selt 15.000 nýjar bifreiðar sl. 5 ár og meðalverð bifreiðar hafi verið 3.000.000 kr., þar af vsk. 24.5%, eða 590.400 kr. Það gera 8.856.000.000 kr. (8.8 milljarðar) í vsk. Og athugið, þennan skatt innheimtu fyrirtækin af viðskiptavinum sínum með vöxtum (áður gengistryggingu og vöxtum) þar sem margir tóku lán fyrir heildarfjárhæðinni."
Bílalánafyrirtækin virðast sem sagt hafa innheimt virðisauka af bifreiðum seldum í kaupleigu, ekki gefið út sölureikninga (þar sem tilgreina skal virðisaukaskatt) og ekki heldur skilað virðisaukanum til skattayfirvalda.
Grein Þórdísar er hér í heild sinni.
Hér er svo nýjasta svarið sem barst frá Avant til Neytendastofu. Neytendastofa vildi ekki snerta á málinu en eftir fortölur Umboðsmanns Alþingis hóf Neytendastofa loks að skoða málið. Það sem vekur þó undrun stjórnar HH er að ríkisskattstjóri eða efnahagsbrotadeild lögreglu hafi ekki tekið málið upp því eins og áður segir er um stórkostleg skattsvik að ræða ef rétt reynist og gögn Þórdísar gefa of sterkar vísbendingar til að horfa fram hjá.
Hagsmunasamtök heimilanna hvetja greiðendur kaupleigusamninga til að fletta upp sölureikningum og samningum fyrir bifreiðakaupunum og kanna hvort virðisauki sé tilgreindur. Sé grunur um misbresti er rétt að tilkynna slíkt til ríkisskattstjóra og/eða til lögreglu. Bifreiðakaupendur áttu að fá í hendur sölureikning fyrir bifreiðinni og virðisauka skal tilgreina á sölureikningum. Skattayfirvöld áttu að fá þann virðisaukaskatt greiddann frá bílalánafyrirtækjunum innan tilskilins frest um skil á vsk. Við skattalagabrotum af þessu tagi liggja viðurlög um sektir og fangelsisvist þeirra sem bera ábyrgð á skattsvikunum.
