Ráðherrarnir hlustuðu á tillögur og rökstuðning HH af athygli. Þeir virtust sammála mörgum af niðurstöðum okkar varðandi þann kerfisvanda sem þarf að leysa en höfðu miklar efasemdir sem fyrr um leiðréttingartillögur samtakanna. Fundarmenn sammæltust um að samningaleiðin væri líklega illskásta leiðin, þ.e. að allir aðilar fjármálakerfisins komi að borðinu til að leysa þann hnút sem þessi mál eru komin í. Við gerðum þeim grein fyrir þeim hættum og kostnaði sem það hefur í för með sér halda óbreyttri stefnu. Við erum ekki viss um að ríkisstjórnin geri sér grein fyrir afleiðingunum þ.e. því siðrofi og fólksflótta sem framundan er, sé haldið áfram á braut eignaupptöku og gjaldþrota.

Hagsmunasamtök heimilanna telja neyðarástand framundan sé ekki tekið strax á málum. Við höfum lagt fram tillögur sem eru fyllilega framkvæmanlegar að okkar mati en hugsanlega þurfi neyðarlög fyrir suma þætti þeirra. Nú hvetjum við fulltrúa lánastofnana og lífeyrissjóða til að koma að samningaborðinu með okkur ásamt ríkisstjórninni. Aðgerðirnar þurfa að vera samræmdar á milli þeirra aðila sem hlut eiga að máli, þ.e. neytendur (heimilin), fjármálastofnanir, lífeyrissjóðir og ríkið.

Eins og segir í fyrirsögn er ekkert fast í hendi og engin ástæða fyrir almenning að láta af þrýstingi um að vandi heimilanna sé leystur án frekari tafa. Tími nefnda og allskyns málþófs er liðinn. Nú þurfa menn að taka til hendinni og klára þetta mál. Verkefnið er að koma í veg fyrir samfélagslegt stórslys. HH hefur áður fengið fundi af þessu tagi en síðan ekki séð neitt gerast af hálfu stjórnvalda í kjölfarið. Vonandi er stjórnvöldum nú alvara með þessum viðræðum en ekki bara verið að kaupa tíma. Við sjáum til hvernig mál þróast næstu daga.